Onsdag 7. juni held eg føredrag om skeiv norsk litteratur gjennom tidene. Arrangementet er ein del av Regnbuedagene og går føre seg på Litteraturhuset i Bergen (16.30–17.30). Meir info her.
I føredraget skal eg mellom anna sjå nærmare på to skeive pionerverk: Odd Lyng (1924) av Alf Martin Jæger og Følelsers forvirring (1937) av Borghild Krane.
Det er den draumen tidlegare trondheimsstudentar ber på, at dei skal få oppdrag på Samfundet.
Fyrstkomande onsdag held eg føredrag på biblioteket i det runde, raude huset. Meir om hendinga her.
Sidan sist har det vore både jol og nyttår, og noko har eg då sysla med i vintermørkeret. Midt i desember heldt eg til dømes føredrag om ord og vendingar som har med sinnsstemningar å gjera («bli opplyft», «vera mørk til sinns»), for ei gruppe lækjarar som spesialiserer seg i psykiatri.
Om lag samstundes hadde eg eit lite innlegg på Språkteigen i P2. Det ligg ute her («Ord ved årets slutt»).
I januar byrja eg på ein ny serie i Dag og Tid: Fram til juni/juli skriv eg fast om eddadikting. Det vert berre ein liten stubb kvar veke, men det er gildt å få bryna seg på desse vidgjetne tekstene.
Noko ferding vert det òg. Mellom anna:
Torsdag 9. februar deltek eg på Prosalong i Stavanger saman med Solveig Aareskjold. Me skal snakka om kjønn og språk før og no.
Torsdag 16. februar skal Lars Anders Kulbrandstad, Bjørn Ivar Fyksen og eg tala om språket til Alf Prøysen. Det heile ber til på Ringsaker bibliotek (Brumunddal). Meir info i aktivitetskalenderen til biblioteket og på Facebook-sida deira.
Onsdag 8. mars høgtidar eg på Ivar Aasen-tunet i Ørsta. Magnhild Folkvord og eg skal tala med Torill Myren om kjønn og slikt, med utgangspunkt i dei siste bøkene våre: Betzy Kjelsberg. Feminist og brubyggjar av Folkvord og mi Kjønn og ukjønn. Det vert musikk ved Jorunn Marie Kvernberg og Gabriel Fliflet. Meir info her.
Ja, og elles skal eg helst koma i gang med nokre bokprosjekt, er von!
Opptak frå Språkdagen 2016 er no lagt ut på YouTube-kanalen til Språkrådet. Der ligg òg heile innlegget eg heldt: «Kvar er du, hen? Kjønnsnormative språkflokar» (her).
Emnet for Språkdagen 2016 var normering av språk. Du finn meir informasjon om dagen her.
Juhu! Laurdag tok eg imot Bokhandelens sakprosapris, som skal «gå til ein forfattar i etableringsfasen som i prisåret utmerkte seg med ei ny bok av høg kvalitet» (frå juryfråsegna). Prisen er eit samarbeid mellom Bokhandelforeningen og Norsk faglitterær forfatter- og oversetterforening. Attåt heider og ære kjem 50 000 kr, noko som slett ikkje er lommerusk, i alle fall ikkje i mi lomme.
Juryen har vore forfattar og sakprosakritikar (i NRK) Arnhild Skre, forfattar og sakprosakritikar (i Morgenbladet) Espen Søbye og omsetjar Kristin Gjerpe. Hjarteleg takk til dei!
Nedanfor er eit bilete frå utdelinga, med generalsekretær i NFF Tore Slaatta til venstre og direktør i Bokhandlerforeningen Trine Stensen til høgre. Under der att eit bilete frå samtalen min med Espen Søbye på sakprosafestivalen laurdag. Takk til alle som kom og høyrde på oss.
Etter nokre rolege veker ved skrivebordet er tida inne for å leda på seg att. I enden på oktober og byrjinga av november skal eg reka ikring både i aust og vest, mellom anna til jubileumsseminaret til Rosa kompetanse (FRI), Sakprosafestivalen og fagseminaret på Falturiltu – nynorsk barnebokfestival. Eg skal tala om høvesvis skeive ord, sisteboka mi, skeiv barne- og ungdomslitteratur. Skakkare vert det ikkje!
Sist fredag var eg i Trondheim og kåserte om språk for Studentmållet i Nidaros (SmiN), som fylte heile hundre år no i september. Veldig stas! Dessutan er det ti år sidan eg sjølv konverterte frå bokmål til nynorsk, eit byte SmiN skal ha mykje av æra for.
Elles kom det nyst ut ei fersk utgåve av Språknytt, med mange interessante stykke (som vanleg) og attpåtil eit intervju med meg. Alt saman finn du her.
Frå Krambua i Trondheim:
Regnbogedagane i Bergen er i gang, ei heil veke med skeive filmar, festar, seminar, debattar og anna sosialt samvær. Ein av debattane har pronomenet hen som tema, og eg har fått æra av å vera ordstyrar for eit flott panel: Stein Wolff Frydenlund (transpolitisk utval i FRI), Sturla Berg-Olsen (Språkrådet), Thomas-Thea Kathrine Gjestland (Forbundet for transpersoner i Norge) og Daniel Wojahn (språkforskar, Södertörns högskola). Skal me formelt innføra dette pronomenet i norsk? Kvifor vekkjer ordet så sterke kjensler?
Eg må elles nemna at Wojahn har skrive ei doktoravhandling som ser særs interessant ut: Språkaktivism. Diskussioner om feministiska språkförändringar i Sverige från 1960-talet til 2015. Her kan du lesa meir om det.
Vel møtt til debatt!
Mai er stinn av grøne hagar og raude dagar (som eg må vedgå at eg ofte brukar til å arbeida i fred og ro) – og den største litteraturfestivalen i Norden. Eg talar om Norsk Litteraturfestival, òg kjend som Sigrid Undset-dagane, og dit skal eg i år! Eg har fått tre spanande oppdrag som du kan lesa meir om her.
Elles i månaden skal eg vera innleiar på eit seminar FTPN skipar til (Forbundet for transpersoner i Norge), halda nynorskkurs for ei gruppe sjuandeklasseforeldre her i Bergen, fara på møte i Litteraturselskapet og vonleg skrive noko vettugt innimellom.
Påskehøgtida nærmar seg, men før det har eg to oppdrag i sør og aust: kåseri på Kristiansand folkebibliotek tysdag 15. mars (19.30) og debatt om ein tredje kjønnskategori, Chateau Neuf i Oslo onsdag 16. mars (18.00). Det er mogleg å sjå debatten live og i opptak på YouTube-kanalen til Kulturutvalet, til dømes på denne sida.
Tilskipinga i Kristiansand er det Kristiansand mållag som står bak. Innlegget mitt har tittelen «Veit du kva du snakkar om?», og her drøfter eg m.a. arbeidet med språkspalta i Dag og Tid og kjem med godbitar frå Norsk etymologisk oppkok (2012).
Kristin Fridtun 