Kommentar om åtaket i Oslo

Eg har skrive eit lite stykke om terroråtaket i Oslo natt til 25. juni, publisert i Dag og Tid 26/2022. Det er mogleg å lesa og høyra kommentaren her.

Elles ser framsida slik ut, med teikning av May Linn Clement.

Lystig på Lillehammer

Norsk litteraturfestival på Lillehammer er over for i år, og det var som vanleg moro å vera med, både som publikum og utøvar. Eg leidde ein samtale om kattar i barne- og ungdomslitteraturen, deltok i ein samtale på arrangementet Skeiv festkveld (biletet) og fekk med meg mangt anna, til dømes slam poesi-gildet på banknatta. No vert det rolege dagar på kontoret framover.

Frå venstre: DJ Cassie Brødskive, Linda Eide, moi og Jens Kihl.

Oppdrag i vest

No byrjar turnéverksemda så smått å ta seg opp att! Laurdag 25. september klokka 18.00 skal eg til Strilabiblioteket Knarvik og halda føredrag om språkirritasjon. Arrangementet er ein del av Nynorskdagane i Alver. To veker seinare skal eg til Litteratursymposiet i Odda, der eg har fått heile tre oppdrag. Eit av dei er ein skeiv aftan der Lars Korff Lofthus og eg samtalar med Jens Kihl om «hug, homs og historie». Storgildt!

Elles skal eg hit og dit halda nokre innlegg på møte og seminar for særskilt inviterte. Så eg får då lufta meg litt – endeleg.

Bokprat på Gjøvik

Torsdag 26. august skal eg til biblioteket på Gjøvik og snakka om Kunsten å irritera seg over skrivefeil. Arrangementet byrjar kl. 19.00 (og varer vel ein snau time). Fri inngang, men på grunn av registrering og slikt bør ein ordna seg ein gratisbillett. Det kan ein gjera her.

Velkomne!

Omtalar og meldingar

No har meldingane byrja koma, og til alt hell er dei gode! Helene Uri skreiv pent om boka i Aftenposten 8. mai. I det nyaste nummeret av Morgenbladet (14. mai) står den gjævaste meldinga eg har fått nokon gong. Meldaren er ingen ringare enn huslingvisten i bladet, Paal Uvaag. Dagen etter stod det ei framifrå melding i Bokmagasinet til Klassekampen, signert Bjørn Ivar Fyksen.

Eg er sjølvsagt glad og letta over at dei rosar boka, men det er òg gledeleg at dei kjem med rettkomne og godt grunngjevne kritiske merknader. Slik skal det vera.

Oppslaget i Morgenbladet:

Den blå boka er komen!

Her koser ho seg saman med dei andre bøkene mine. På Facebook-sida til Det Norske Samlaget ligg eit liten videosnutt der eg pratar om boka. Og så kryssar eg fingrane for at det kjem nokre bokmeldingar etter kvart.